ភ្នំពេញ៖ នាយកដ្ឋានប្រយុទ្ធនឹងជំងឺឆ្លង CDC បានបញ្ជាក់ថាគ្មានជំងឺអុតស្វាត្រូវបានរកឃើញនៅកម្ពុជានោះទេរហូតមកដល់ពេលនេះ ក្រោយរកឃើញអ្នកសង្ស័យ ៦នាក់តែបានធ្វើតេស្តឃើញលទ្ធផលអវិជ្ជមាននៃជំងឺ។ ទោះជាយ៉ាងណានាយកដ្ឋានជំរុញពលរដ្ឋឱ្យប្រុងប្រយ័ត្ននិងតាមដានករណីសង្ស័យនៃជំងឺ។

ប្រធាននាយកដ្ឋានប្រយុទ្ធនឹងជំងឺឆ្លងលោកវេជ្ជបណ្ឌិត លី សូវ៉ាន់ បានឱ្យ EAC News ដឹងថាទោះបីជាមិនទាន់រកឃើញករណីឆ្លងជំងឺអុតស្វានៅកម្ពុជាក៏ដោយ តែរដ្ឋាភិបាលបានបញ្ជាទៅសមត្ថកិច្ចតាមព្រំដែនទាំងអស់ត្រួតពិនិត្យរាល់ករណីសង្ស័យទាំងអស់នៅពេលដែលចូលមកកម្ពុជា ជាងនេះទៅទៀតនៅក្នុងស្រុកក៏បង្កើនការប្រុងប្រយ័ត្នផងដែរស្របពេលដែលជំងឺបានឆ្លងចូលក្នុងសហគមន៍នៃប្រទេសមួយចំនួនហើយ។

លោកថា៖ «ដោយសារវាមានការឆ្លងសហគមន៍អញ្ចឹងហើយយើងត្រូវប្រុងប្រយ័ត្នខ្ពស់ហើយព្រោះកន្លងទៅជំងឹនេះឆ្លងពីអាហ្វ្រិកវានាំចេញទៅប្រទេសដទៃហើយយើងរកឃើញទៅក៏វាស្ងាត់ទៅ។ តែក្នុងករណីថ្មីៗនេះជំនាញការអង្កការសុខភាពពិភពលោកយើងប្រាប់ថាបច្ចុប្បន្នវាឆ្លងសហគមន៍អញ្ចឹងឱ្យយើងប្រុងប្រយ័ត្ន។ ព្រោះជំងឺនេះវាឆ្លងតាមទឹកមានតាមការក្អកកណ្ដាស់ នៅជិតដិតជាមួយគ្នា ហើយឬប៉ះទឹករងៃដែលចេញពីពងបែកហ្នឹងវាអាចឆ្លងបាន តែវាខុសពីកូវីតៗងាយនឹងឆ្លងខ្លាំងជាង គ្រាន់តែក្អកអញ្ចឹងយើងអត់ចាក់វ៉ាក់សាំងអត់អីងាយនឹងឆ្លងណាស់! តែជំងឺនេះវិញវាទាល់តែប៉ះពាល់ជិតដិត»។

លោកជំរុញដល់ពលរដ្ឋមានការប្រុងប្រយ័ត្ននិងតាមដានខណៈមានករណីសង្ស័យសូមទៅពិគ្រោះជំងឺនៅមន្ទីរពេទ្យជិតបំផុត ឬទូរស័ព្ទទៅលេខ ១១៥។

រោគសញ្ញានៃជំងឺអុតស្វាមានកន្ទួលឬពងបែក លើដៃ បាតដៃ ជើង បាតជើង ឬលើមុខ និងមានរោគសញ្ញាមួយឬច្រើនដូចជាគ្រុនក្តៅលើស ៣៨,៥អង្សាសេ ឈឺសាច់ដុំ ឡើងកូនកណ្តុរ ឈឺក្បាល ឈឺខ្នង៕